മമത ബാനര്‍ജി 1996ലെ വി.എസ്. അച്യുതാനന്ദനെ മാതൃകയാക്കണം -ബി.ജെ.പി നേതാവ് സുവേന്ദു അധികാരി..!! കാരണം..
കൊല്‍ക്കത്ത: നന്ദിഗ്രാമില്‍ തോല്‍വി ഏറ്റുവാങ്ങിയ ബംഗാള്‍ മുഖ്യമന്ത്രി മമത ബാനര്‍ജി ഭവാനിപൂരില്‍ മത്സരിക്കുന്നതിനെതിരെ വിമര്‍ശനവുമായി ബി.ജെ.പി നേതാവും മമതയുടെ മുന്‍ സഹപ്രവര്‍ത്തകനുമായ സുവേന്ദു അധികാരി. 1996ലെ തെരഞ്ഞെടുപ്പില്‍ മാരാരിക്കുളത്ത് പരാജയപ്പെട്ട വി.എസ്. അച്യുതാനന്ദനെ ഉദാഹരിച്ചാണ് സുവേന്ദു വിമര്‍ശനം ഉന്നിയിച്ചത്.
''ധാര്‍മികമായി മമത മുഖ്യമന്ത്രി പദത്തിന് അര്‍ഹയല്ല. അവരുടെ പാര്‍ട്ടി വിജയിച്ചെങ്കിലും അവള്‍ നന്ദിഗ്രാമിലെ ജനങ്ങളാല്‍ തിരസ്കരിക്കപ്പെട്ടു. 1996ല്‍ കേരളത്തില്‍ എല്‍.ഡി.എഫ് വിജയിച്ചു. പക്ഷേ അന്നത്തെ അവരുടെ മുഖ്യമന്ത്രി സ്ഥാനാര്‍ഥിയായിരുന്ന വി.എസ് അച്ചുതാനന്ദന്‍ പരാജയപ്പെട്ടു.
പക്ഷേ അദ്ദേഹം മുഖ്യമന്ത്രി പദം ഏറ്റെടുത്തില്ല. ഇത് മാതൃകയാക്കണം'' -സുവേന്ദു ഒരു അഭിമുഖത്തില്‍ പറഞ്ഞു.
തൃണമൂലില്‍ നിന്നും ബി.ജെ.പിയിലേക്ക് കളംമാറിയ സുവേന്ദു അധികാരിയുടെ വെല്ലുവിളി ഏറ്റെടുത്താണ് സുവേന്ദുവിെന്‍റ തട്ടകമായ നന്ദിഗ്രാമില്‍ മമത പോരിനിറങ്ങിയത്. ഇഞ്ചോടിഞ്ച് പോരാട്ടത്തിനൊടുവില്‍ മമത അടിയറവ് പറയുകയായിരുന്നു. മുഖ്യമന്ത്രി പദം ഏറ്റെടുത്തതിനാല്‍ നിയമപ്രകാരം ആറുമാസത്തിനകം ജനവിധി തേടണമെന്നാണ് നിയമം. ഭവാനിപൂര്‍ മണ്ഡലമാണ് മമത മത്സരത്തിന് തെരഞ്ഞെടുത്തിരിക്കുന്നത്.
അവിടുത്തെ സിറ്റിങ് എം.എല്‍.എയായ തൃണമൂല്‍ കോണ്‍ഗ്രസിലെ മുതിര്‍ന്ന നേതാവ് സോവന്‍ ദേബ് ചട്ടോപാധ്യായ മമതക്ക് മത്സരിക്കാന്‍ വേണ്ടി എം‌എല്‍‌എ സ്ഥാനം രാജിവെച്ചിട്ടുണ്ട്. അതിനാല്‍ തന്നെ ഭവാനിപൂര്‍ ഉപതെരഞ്ഞെടുപ്പ് ഫലം മമതയേയും തൃണമൂലിനെയും സംബന്ധിച്ച്‌ ഏറെ നിര്‍ണായകമാകും.ഇവിടെ നിന്ന് രാജിവെക്കുന്ന ചട്ടോപാധ്യായ ഖാര്‍ദ സീറ്റില്‍ മത്സരിക്കുമെന്നാണ് സൂചന. ഖാര്‍ദയിലെ എം.എല്‍.എയും തൃണമൂല്‍ നേതാവുമായ കാജല്‍ സിന്‍ഹ മരണപ്പെട്ട ഒഴിവിലാണ് അവിടെ ഉപതെരഞ്ഞെടുപ്പ് നടക്കുന്നത്.
No comments